[ad_1]

​ដោយៈ គង់​ហេង​/ កំពង់ចាមៈ អាជ្ញាធរខេត្ត​កំពង់ចាម បាន​ជំរុញ​ឱ្យ​អាជ្ញាធរ​ឃុំ សង្កាត់​បង្កើន​ការ ផ្តល់​សេវា​រដ្ឋបាល​សាធារណៈ របស់​រដ្ឋ ជូន​ប្រជាពលរដ្ឋ ប្រកបដោយ​គុណភាព ប្រសិទ្ធភាព គឺ​ជៀសវាង ការ​អួ​ស​បន្លាយ ពេលវេលា ដើម្បី​លាភសក្ការៈ​នោះ​។​
​នេះ​ជា​ថ្លែង​របស់លោក អ៊ុន ចាន់​ដា អភិបាលខេត្ត​កំពង់ចាម ក្នុងឱកាស​ដែល​លោក​ក្នុងនាម​គណៈកម្មាធិការ​កណ្តាល និង​ប្រធាន​គណៈកម្មាធិការ គណបក្ស​ប្រជាជន​កម្ពុជា និង​សមាជិក សមាជិការ​ជា​អ្នកចូលរួម​សរុប​ប្រមាណ ៣០០ នាក់​ក្នុង​ពិធី​សម្ពោធ​ដាក់ឱ្យ​ប្រើប្រាស់​នូវ​អគារ​ស្នាក់​ការឃុំ​កោះអណ្តែត ស្រុក​ស្រី​សន្ធរ របស់​គណបក្ស​ប្រជាជន​កម្ពុជា និង​សមិទ្ធផល​នានា​តម្លៃ​សរុប​ប្រមាណ​ជិត​ប្រាំមួយ​ម៉ឺន ដុល្លារ នៅ​ថ្ងៃអាទិត្យ​ថ្ងៃទី ២៦ ធ្នូ​នេះ​។​
​លោក​ប្រធាន​គណៈកម្មាធិការ​គណបក្ស​ប្រជាជន​កម្ពុជា ខេត្តកំពង់ចាម​បាន​ថ្លែងថាៈ មេឃុំ ចៅសង្កាត់ ក្រុមប្រឹក្សាឃុំ សង្កាត់ ជំទប់​ទី​១ និង​ស្មៀន សូម​បន្ត​យកចិត្តទុកដាក់ បង្កើន​នូវ​គុណភាព ប្រសិទ្ធភាព ការផ្តល់សេវា គឺ​សេវា​របស់​រដ្ឋ កុំឱ្យ​ប្រជាពលរដ្ឋ​ត្អូញត្អែរ គឺជា​ពិសេស​មិនត្រូវ​អូសបន្លាយ​ពេលវេលា នៃ​ការផ្តល់សេវា ដើម្បី​ចង់​លាភសក្ការៈ​នោះឡើយ​។​ក្នុងនោះ​ការផ្តល់សេវា​ដីធ្លី​ត្រូវបាន​លើក​មក​ធ្វើ​ដោះស្រាយ ដោយ​បង្រួញ​នីតិវិធី​។
​លោក​បាន​បន្តថាៈ ពីមុន​យើង​មិនបាន​ដឹង​ឥឡូវ គឺ​ត្រូវបាន​ប្រជាពលរដ្ឋ​ប្រាប់​មកវិញ​ថា ស្នើសុំ​ចុះបញ្ជី​ដីធ្លី​បន្ថែម ឬ​ផ្ទេរកម្មសិទ្ធិ គឺ​ប្រើពេល​ដល់ បួន ទៅ ប្រាំ​ខែ​។ ចំណុច​នេះ​ស្នើ​ដល់​អាជ្ញាធរ​ឃុំ សង្កាត់​ទាំងអស់​ជំរុញ​ការផ្តល់សេវា​ឱ្យបាន​លឿន គឺជា​សេវា​មួយ​ប្រកបដោយ​គុណភាព និង​ភាព​គួរឱ្យ​ទុកចិត្តបាន បើ​មាន​បញ្ហា​សូម​រាយការណ៍​ត្រឡប់មកវិញ ពី​ការផ្តល់សេវា​យឺត ដើម្បីឱ្យ​អាជ្ញាធរខេត្ត​ទទួល​យកមក​ដោះស្រាយ ឬ​បង្រួញ​នីតិវិធី គឺ​ដើម្បី​ផ្តល់​ភាពងាយស្រួល​ទាំង​អ្នកទទួល​សេវា និង​ទាំង​អ្នកផ្តល់​សេវា​៕​

The post ជំរុញ​ការផ្តល់សេវា​រដ្ឋបាល​ឱ្យបាន​លឿន​ជៀសវាង​អូសបន្លាយ​ដើម្បី​លាភសក្ការៈ​ appeared first on Rasmei Kampuchea Daily.

[ad_2]

Source link